Monday, February 13, 2017

DOST mihatag himan alang 
sa Panglao Tourism Facility

TAGBILARAN CITY, February 8 (PIA)--Sa diwa sa tinabangay ug subay sa ilang tumong sa pagsuporta sa mga ginagmay nga negosyo pinaagi sa teknolohiya, gitunol sa Department of Science and Technology (DOST) ngadto sa bag-ong Tourism Facility sa Panglao ang mga kahimanan alang sa pag-andam sa pagkaon. 

Didto sa pagtunol sa bag-ong P5 milyones nga pasilidad aron magamit sa mga Senior High School sa Lourdes National High School sa ilang kurso nga magsilbi alang sa turismo, si DOST Regional Director Edilberto Paradela mibutyag nga ang pagpaseguro sa limpyo ug luwas nga pagkaon magtanyag usab sa mas daghang kahigayunan sa kita ug dugang trabaho. 

Ug tungod kay ang bag-ong pasilidad aron himoong kat-onanan sa mga estudyante nga mikuha sa kurso nga turismo, may kusina man, nakig-alayon dinhi ang DOST, kinsa giangkon usab nga duol nga silingan sa Department of Education (DepED). 

Gitunol ni RD Paradela ang mga moderno nga kahimanan sama sa de makina nga tighimo og banana chips, industriyal nga gas stoves (luto-anan), mga dagkong kawa, stainless nga sa-an, stainless nga lamesa, stainless nga paughanan sa mga gamit lakip na ang casters, duha ka ang-ang nga gas oven ug planetary mixer. 

Ang pagtunol gisaksihan nila ni Gob Edgar Chatto, DepED Bohol Superintendent Wilfreda Bongalos, Bise Mayor Pedro Fuertes, mga tinugyanan sa Asia Foundation ug Colaition for Change in Education, kinsa maoy una nag conceptualize sa katukoran sa tourism facility. 

Mismo si DepED Regional Director Juliet Jeruta midayeg usab sa DOST, kinsa ila na nga giisip nga maayong silingan, tungod usab sa concern niini sa paghatag dugang kahigayunan sa mga kabataan sa pagkat-on, labi na sa pagtrabaho. 

Ang DOST usa lang sa pipila ka ahensya sa kagamhanan nga mitampo alang sa pagkompleto sa pasilidad nga kahimo-an sa mga estudyante sa bansay aron mamahimong maayong trabahante sa industriya sa turismo. 

Ang facility gipundohan sa kagamhanang probinsyal sa Bohol pinaagi sa Special Education Fund. 

Ang tulo ka mga lawak, lobby ug kurisa gitabangan og furnish sa mga pribadong resorts sama sa Bohol Beach Club, South Palms ug Mithi Spa and Resort, Amorita ug Tarsier Botanika, Abenson, Panglao LGU ug ang DOST. 

Ang mga himan nga gihatag sa DOST alang sa bag-ong turism facility, gipakuygan pa sa laing tanyag. 

Matud ni RD Paradela, usa ka bansay alang sa food safety ug packaging mahimo na usab nga gamiton sa mga magtutunghan nga motapos sa Senior High School karon umaabut nga Marso. (rac/PIA-7/Bohol)

No comments: